CD As Pontes Feminino

O CD AS PONTES SALVOUSE MATEMÁTICAMENTE HOXE DOMINGO 

Tralo remate da xornada 36 tanto en Segunda B coma en Terceira, confírmase que o CD As Pontes continuará un ano máis na máxima categoría do fútbol galego.

Algúns rumores apuntaban a que este feito xa estaba consumado e garantido dende a semana pasada, pero non era así, nin o domingo pasado gañando en Noia 1-3, e menos onte coa derrota 0-3 ante o Vilalbés.

Parte de salvación do As Pontes chegou na mañá deste domingo, co empate do Sporting B, que garantía a salvación do Coruxo.

Na xornada de tarde confirmouse que o Compostela desgrazadamente xa está descendido, polo que habería un mínimo de cinco descensos en Terceira. O Celta B deu hoxe un paso de xigante cara a permanencia tras gañar en Somozas (1-3), e librase do descenso directo, pero non da posibilidade de xogar a promoción de descenso, que agardemos non aconteza, pero existiría esa remota opción de baixar dous equipos galegos de 2ªB, que polo tanto implicaría seis descensos en Terceira.

Nesta categoría, o As Pontes é décimo con 48 puntos e é fixo que cinco equipos, Mugardos (40), Bergantiños (37), Ribadeo (34), Verín (31) e Noia (31) acabarán por detrás dos ponteses.

Dos cinco equipos que están na clasificación inmediatamente por detrás dos azuis, o Ordes (15º) ten 42 puntos e podería chegar ós 48 dos azuis, ó que lle teñen gañado o goal average.

Un escalón por riba están Ribadumia (11º con 45), Negreira (12º con 45), Silva (13º con 44) e Barbadás (14º con 44), pero estes equipos enfróntanse entre eles, e aínda que por unha combinación de resultados todos poderían chegar ós 48 do As Pontes, e Silva e Ribadumia teñen o goal average a favor con respecto ós azuis, non así Negreira e Barbadás. Tamén, no remoto caso de que houbese varios conxuntos empatados a 48 puntos sempre habería un mínimo de un equipo por debaixo dos azuis.

Nova cortesía de Xose Ferreiro

miguel

ROLDA DE ELIMINATORIAS NA COPA DO MUNDO DE SHANGAI

O arqueiro pontés Miguel Alvariño García disputou hoxe as tiradas eliminatorias da primeira proba da Copa do Mundo que se está a celebrar en Shanghai (China).

No día de onte foi o 30º clasificado nas previas con 665 puntos, o mellor dos españois, por diante de Miguel Ángel Pifarre (34º, 664), Juan Ignacio Rodríguez (41º, 661) e Antonio Fernández (94º, 638). O mellor foi o mítico Brady Ellison, con 697.
Por certo, en Composto, o holandés Mike Schloeeser, que estivera no torneo pontés en Decembro, bateu o Récord do Mundo, con 717 puntos de 720 posibles, é dicir, conseguiu 69 deces e 3 noves.

Na competición de Recurvo Mixto, cos dous mellores clasificados de cada país, Alvariño e a prometedora Alicia Marín, foron undécimos na previa, cruzándose en oitavos con Rusia, sexta, coa que perderon 5 a 1 (36-33, 33-33, 40-36). Ouro polo que pelexarán China Taipei e EEUU, e polo bronce Corea do Sur e India.

No día de hoxe, nas roldas eliminatorias, os españois superaron a primeira criba. Alvariño vencía ó checo Peter Heinrich 7-1 (26-25, 27-27, 29-25 e 27-23). Miguel Ángel Pifarre gañaba na frecha de desempate ante o malayo Nor Hasrin 6-5, Juan Ignacio Rodríguez ó colombiano Estiven Ramírez 7-3, e únicamente caía Antonio Fernández, moi apurado ó ser 94º da previa e ter que enfrontarse ó coreano Seong Cheol Park, 19º, co que perdeu 2-6.

Xa na segunda eliminatoria caeron os tres. Alvariño perdeu ante Hao Wen Kao, de China Taipei, 0-6 (26-27, 26-29 e 27-28). Juan Ignacio ante o xaponés Kazuki Ohi, 2-6, e máis resistencia opuxo Pifarre ante o ruso Alexander Kozhin, verdugo de Alvariño e Alicia nos mixtos, 4-6.

Nesta proba pelexarán o outro o estadounidense Zach Garret e o holandés Sjef Van den Berg, do que Miguel dera boa conta na final de Bakú. Polo bronce, o mexicano Boardman e Wei, de China Taipei.

Algo mellor estiveron as mulleres. Celia Castaños perdeu na primeira rolda na frecha de desempate ante a francesa Laura Ruggieri 5-6. Pola súa banda Alicia Marín quedaba exenta ó ser 11ª da previa, Mirene Etxeberría, prata por equipos mixtos xunto a Alvariño no Mundial Junior 2013, vencía á mítica e veterana francesa Berengere Schuh, 6-2, ex campiona europea ó aire libre e mundial en sala. Tamén Adriana Martín vencía á mongola Oyuntungalag Chimedtseren 6-2.

Na segunda rolda, Ariana Martín vencía á turca Begunhan Elif Unsal, 6-4, a arqueira que fora bronce nos Europeos de Rovereto 2010 con 17 anos e deixara a Gema Buitrón polo camiño. No duelo fratricida, Mirene Etxeberría vencía a Alicia Marín 6-2.

Xa na terceira criba, Etxeberría caeu ante a xaponesa Kaori Kawanaka 0-6, e Adriana ante a coreana Hyebhin Ju 1-7, arqueira que pelexará o ouro con Ya Ting Tan, de China Taipei, mentres que polo bronce, outra coreana, Chaeyun Kim, contra a danesa Maja Jager.

Mañá será a competición por equipos, os homes, décimos, comezarán contra Xapón, sétimo, e as mulleres, undécimas, contra Xeorxia, sexta.

12960164_514536578732437_1349122045_n

Foto da estancia de Miguel en Corea, con Park Sung Hyun, tricampiona olímpica, e Park Kyun Mo, bicampión olímpico.

Nova cortesía de Xose Ferreiro

ROLDAS POR EQUIPOS EN SHANGHAI

No día de hoxe disputábanse as competicións por equipos na primeira proba da Copa do Mundo de Tiro con Arco que se está a celebrar en Shanghai.

O equipo masculino, de Alvariño, Pifarre e Rodríguez, os tres que mellor puntuación obtiveron en individual, 1990 puntos, no décimo posto, enfrontaron en oitavos de final coa Xapón de Oniyama, Ohi e Furukawa, que sumara 1998, na sétima praza. Nun duelo moi igualado, con 56-56 no primeiro set, 57-58 no segundo, 54-53 no terceiro e empate 3-3, decidiuse todo na última tanda, con 55-57 para os xaponeses e o definitivo 3-5.

Corea e Holanda polo ouro e polo bronce Gran Bretaña e India.

O equipo feminino quedou a un paso das medallas. Presentábanse en oitavos de final Alicia Marín, Adriana Martín e Celia Castaños, con 1934 puntos, na undécima praza da previa, e enfrontaban a Xeorxia, que sumou 1954, na sexta praza, vencendo o cunxunto español 5-3 (54-52, 53-53, 53-55 e 55-50).

En cuartos cruzáronse con Rusia, e nun duelo moi disputado, con 54-47, 55-56, 53-54, e 52-49, e o 4-4 no marcador, chegábase ó desempate, con tres frechas de ouro, unha por cada integrante, caendo do lado ruso, 26-28, acabando o conxunto español na quinta posición.

Polo ouro, China Taipei e a India, e polo bronce Alemania contra as rusas.

Nova cortesía de Xose Ferreiro

TERCEIRA DIVISIÓN. CD AS PONTES 0 – RACING CLUB VILALBÉS 3

Contundente triunfo no derbi, do Racing Vilalbés, que durme a tres puntos do play off, metendo presión a Choco e Deportivo B. É que os lucenses xogaron o partido con máis ambición, saltando ó campo sen contemplacións, co equipo de gala. Non así o As Pontes, que, virtualmente salvado, quixo dar minutos ós seus xogadores menos habituais.

Así, tras un primeiro tempo sen xogadas destacadas; apenas resaltar unha boa xogada de Cañi, que lla cede a Óscar, dispara, rexeita como pode Diego, e o propio Cañi fusila ó fondo das mallas, lixieramente en fora de xogo (25´); nos primeiros vinte do segundo, o conxunto chairego pasou por riba dos azuis.

Adiantáronse, tras unha pérda de balón de Adrián, froito do costume do conxunto local de arriscar xogando dende atrás, quixo driblar a dous dianteiros, roubaronlle a carteira, e foi Villares, que regateou a Cristian, e aínda escorado, rematou marcando por alto (52´).

Logo foi Gerardo, quen, ante a pouca contundencia da zaga local, acabou fusilando dentro da área ó porteiro (57´), que entremedias realizou un paradón nunha vaselina de Villares (55´).

Tras unha cabalgada por banda dereita do recén ingresado no campo Rubén Gómez, que se lle vai a Chote, centra ó segundo pau, chega completamente só Gerardo, e bate de cabeza a un dubitativo Cristian (65´).

Xa cos deberes feitos, o Vilalbés procurou ampliar o marcador nas contras e os locais recurtar distancias pero sen moito tino, apenas resaltar un disparo de Santi fora da área (60´), e unha clara de Pardo mal finalizada (78´).

O As Pontes segue con 48 puntos, e non é moi factible que sume ante o Cerceda, que se xoga a Liga, e Deportivo B, que loita polo play off, así que seguramente acabará salvándose matemáticamente polos tropezos dos seus rivais de abaixo, pois algúns cruzanse entre eles.

O Vilalbés consegue o seu quinto triunfo en partido oficial no Poboado; e ademais co resultado máis contundente dun conxunto que as anteriores ocasións vencera pola mínima; por cinco empates e sete victorias dos locais. A afección pontesa celebra seguir unha temporada máis na categoría nun ano complicado, ainda que queda disgustada pola imaxe ofrecida ante o conxunto veciño e en xeral durante toda a segunda volta.

0 CD As Pontes. Cristian, Hugo, Juan (Pardo 57´), Chote, Manu, Adrián (Pablo Ramos 62´), Toni, Óscar (Dani 57´), Santi, Cañi, Pablo Domínguez.

3 Racing Vilalbés. Diego López, Dani García, Alex, Xusto, Muíña, Javi Varela (Pablo Vivero 84´), Iago Blanco (Rubén Gómez 65´), Make, Sergio Arias, Gerardo (Iván 77´), Villares.

Goles: 0-1, Villares (52´), 0-2, Gerardo (57´), 0-3, Gerardo (65´).

Campo e incidencias: Campo de O Poboado. Uns 200 espectadores. Tarde soleada. Partido correspondente á 36ª xornada.

Árbitro: David Iglesias Melón (Vigo). Auxiliado por Lorenzo Álvarez e Mosquera Goce. Amoestou a Juan, Chote, Adri, Dani, Alex, Muíña e Javi Varela.

Nova cortesía de Xose Ferreiro e A.F.

CLUB DEPORTIVO AS PONTES: RESULTADOS 29-30-ABRIL / 1-MAIO / 2016 

Derradeira fin de semana de Abril e tamén primeira de Maio que nos deixa a salvación matemática do CD As Pontes por mor do empate do Sporting B, que salvou ó Coruxo e polo tanto tamén ó As Pontes.

O Cadete queda definitivamente no segundo posto, gaña o Xuvenil e empata o feminino. O Alevín A segue segundo, o Benxamín A celebra o seu título de Liga gañando na Barqueira, e un xenial Prebenxamín A garante quedar terceiro no grupo dos mellores. Tamén está terceiro o Prebenxamín B.

SEGUNDA AUTONÓMICA GALEGA (Ferrol)
CCRD Perlío – CD As Pontes “B” (2-1)

Perdeu o segundo equipo na súa visita ó Perlío (2-1). Comezou adiantándose o cadro de Fene por medio de Xabier Riobo, e o mesmo xogador ampliou o marcador no comezo do segundo. A cinco minutos do final recortou distancias Marcos Novo, pero non houbo tempo para máis e os de Paco López, novenos con 19, posición que garanten, pois Ortigueira, Estrella e Cebarca quedarán por detrás, despedirán a Liga recibindo ó Cariño, cuarto. Xogaron Rafita, Criado, Alex Cabarcos, Darío, Jandro, Totti, Pablo Ramos, Juan, Marcos, Guille e Rubén, saíndo despois Manu, Adrián e Jorge.

LIGA FEMININA F8 (D. Ferrol)
Mandiá CF – CD As Pontes (1-1)

O feminino empatou a un gol na súa visita ó Mandiá, co que son sextas con 57 puntos, e salvo sorpresa, finalizarán a liga nesa posición. Xogaron Paula Baamonde, Yolanda, Uxía, Nuria, Indira, Vicky, Xeila, Paula Castro, Carlota, Yara e Yaiza. As ferrolás adiantáronse no primeiro período por medio de Eva pero foi Xeila de penalti a dez do final, quen facía o 1-1 definitivo. Terceira xornada consecutiva marcando, e cuarto da tempada. Reciben ó perigoso Racing Ferrol, líder e xa campión con 31 triunfos por unha soa derrota.

PRIMEIRA GALEGA XUVENIL (D. Ferrol)
CD As Pontes – Galicia de Mugardos (5-1)

O Xuvenil venceu por 5-1 ó colista Galicia de Mugardos en partido disputado na mañá do domingo no campo principal do Poboado. Terceiros con 45 puntos rematarán a competición visitando ó San Sadurniño, sétimo. Goles de Alberte Ledo (2), David Rey (2), e Casas. Xogaron Lino, Antón, Andrés, Martín, Alex Blanco, Alex Cabarcos, Xose, Ayrton, Jandro, Alberte, Manuel, entrando despois Carlos, Iván, Rey, Iago e Casas.

PRIMEIRA GALEGA CADETE (D. Ferrol)
SD O Val – CD As Pontes (4-4)

O Cadete dixo adeus definitivamente á Liga. Empatou (4-4) por sorpresa na casa do noveno clasificado, O Val, algo lastrado polas baixas dos seus dianteiros Dani e Alberte, que unido á goleada do Portuarios ó Perlío (7-0) dálle a Liga ós ferroláns, pois os arlequinados suman 57 puntos por 54 dos azuis, co goal average a favor, a falta de unha xornada, na que os azuis recibirán ó colista, Galicia de Mugardos, antes de xogar a fase de ascenso coma segundo clasificado. Mateo adiantaba ós azuis, dous tantos consecutivos de Borja dábanlle a volta ó marcador, pero Bruno poñía o 2-2 antes do descanso. Ó pouco do segundo tempo Carlos poñía o 2-3 e Mateo un tranquilizador 2-4, pero dous goles de Adrián, un faltando dez minutos e outro co tempo cumprido, poñían o 4-4 definitivo. Xogaron Mateo Cociña, Alex López, David, Manuel, Bruno, Pani, Carlos, Javi, Mateo, Cazás e Chema, entrando despois Alex Barro, Germán, Diego e Jose.

PRIMEIRA AUTONÓMICA INFANTIL (D. Ferrol)
SRD Ánimas – CD As Pontes (1-0)

O Infantil perdeu 1-0 na súa visita ó Animas, con tanto de Óscar nos últimos minutos, co que finaliza a Liga noveno clasificado con 12 puntos. Xogaron Juan, Nono, Iván, Alex Riobo, Antonio, Xavi, Xan, Xoel Pena, Vicente, Dani, Joan, e despois Eloy e Marcos.

PRIMEIRA CATEGORÍA ALEVÍN (D. Ferrol)
CCRD Perlío – CD As Pontes (2-5)
CD As Pontes “B” (Descansou)

O Alevín A gañou 2-5 na súa visita ó que era terceiro clasificado, Perlío, con tantos de Hugo Blanco, Xose Paz, Alex López, Ismael Freire e un en propia meta, co que apuntala a súa segunda praza con 33 puntos, iso si, lonxe do primeiro, Eume, 37. Reciben ó Narón Freixo, oitavo. Descansou o Alevín B, o que aproveitou o Neda para voltar ó liderado tras gañar ó Ánimas B 0-3. Así teñen 40 puntos, por 39 dos ponteses, iso si, cun partido máis. Os azuis visitan a vindeira xornada a un perigoso Numancia, quinto con 33 puntos.

PRIMEIRA CATEGORÍA BENXAMÍN (D. Ferrol)
UD Cebarca – CD As Pontes (4-5)
CD As Pontes “B” – Meirás CF (3-6)

O Benxamín A venceu 4-5 na Barqueira, ante o Cebarca, nun encontro moi disputado e equilibrado ata o derradeiro minuto. Marcaron Israel Varela, Antón Varela (3) e Anxo Blanco. Xa campións, lideran con 46 puntos, por 40 do Val C, rematando a Liga recibindo ó Perlío, quinto. O Benxamín B, pola súa banda, perdeu na casa por 3-6 co Meirás. Tantos de Diego Lozano e Adrián Díaz (2), que empataron por tres veces o encontro, pero definitivamente venceron os de Valdoviño. Quintos con 25 puntos, rematan a Liga visitando ó CD Narón, cuarto con 36.

PRIMEIRA CATEGORÍA PREBENXAMÍN (D. Ferrol)
CD Narón – CD As Pontes (2-7)
CD As Pontes “B” – Racing San Pedro (7-4)

Xenial o Prebenxamín A, que gañou 2-7 ó quinto, CD Narón. Goles de Xoel Vigo, Paulo Cabaleiro, Nicolás Meizoso (2), Alexander Venancio, Xalo González e Diego Ortigosa. Sitúase terceiro con 35 puntos, a dous do Racing de Ferrol, que visita o Poboado na vindeira e derradeira xornada. Xa garanten a terceira praza como mínimo, pois sacan tres puntos ó cuarto Ánimas, co goal average a favor. O Prebenxamín B venceu por 7-4 ó Racing San Pedro, tantos de Iker Ares (2), Nacho Villasuso (2), Xandre Domínguez (2) e Felipe Riveira. Os ponteses son terceiros con 41 puntos antes de visitar ó Eume B, oitavo.

Nova cortesía de Xosé A. Ferreiro e A.F.

COPA DE FÚTBOL DE VETERANOS DE AS PONTES 

Terceira xornada de copa con vitorias de La Galaxia, Mobles Eume, Farmavida e Galiorient

Triunfos pola mínima (3-2) de La Galaxia e Mobles Eume sobre Electricidad J&O e Bar Xardín, e goleadas de Farmavida a MMYPEM por 4-0 e Galiorient sobre A Cepa por 6-4

As Pontes 74 e Mobles Eume, con seis puntos cada un, encabezan a clasificación do grupo A, mentres que Galiorient é líder en solitario no grupo B con 7 puntos, seguido de Santaballés con seis puntos e un partido menos. Seguen sen puntuar nesta fase de grupos Electricidad J&O e A Cepa.

Na cuarta xornada hai que sinalar como encontros máis destacados os que disputarán os dous primeiros de cada grupo, Mobles Eume-As Pontes 74 e Santaballés- Galiorient.

COPA (3ª Xornada) 30-Abril / 1-Maio / 2016

Electricidad J&O – La Galaxia (2-3) Manolo (2) / Sito, Juan e Nené
Mobles Eume – Bar Xardín (3-2) Luis (2) e Iván / Javi e Mieres
MMYPEM – Farmavida (0-4) Pichote, Chente, Óscar e Juanjo
Galiorient – A Cepa (6-4) Tomás (2), Suso (2), Paco e Geluco
Descansaron: As Pontes 74 e Santaballés

COPA (4ª Xornada) 30-Abril / 1-Maio / 2016

Farmavida – A Cepa (Sáb. 7, 20,00 h)
Electricidad J&O – Bar Xardín (Dom. 8, 10:00h)
Mobles Eume – As Pontes 74 (Dom. 8, 11:00 h)
Santaballés – Galiorient (Dom. 8, 12:00 h)
Descansan: La Galaxia e MMYPEM

Nova cortesía de A.F.

Esta entrada foi publicada en Novas equipo masculino C.D. As Pontes. Ligazón permanente.

Deixar unha resposta

introduce os teu datos ou preme nunha das iconas:

Logotipo de WordPress.com

Estás a comentar desde a túa conta de WordPress.com. Sair /  Cambiar )

Google photo

Estás a comentar desde a túa conta de Google. Sair /  Cambiar )

Twitter picture

Estás a comentar desde a túa conta de Twitter. Sair /  Cambiar )

Facebook photo

Estás a comentar desde a túa conta de Facebook. Sair /  Cambiar )

Conectando a %s

A %d blogueros les gusta esto: