—

ACTUACIÓN DE MALENA MIERES EN LLÍRIA

A selección sub18 trouxo un balance de unha vitoria e unha derrota

A futbolista pontesa do RC Deportivo da Coruña Malena Mieres xogou esta fin de semana en Lliria a primeira fase do Campionato de España Sub18.

A selección galega xuvenil comezou a súa participación gañando 4-1 ó complicado conxunto vasco, con dous goles de Tatiana Barcia, e un de Carolina Brañas e María Nogueira, todas elas xogadoras do Victoria de Santiago.

Xa ao día seguinte, nada puideron facer ante a locataria Comunidade Valenciana, que gañou 3-0, con tantos nos inicios de cada tempo, e preto do final.

Malena xogou os dous encontros. Pola súa banda a selección sub16 gañou 1-0 ó País Vasco e empatou 1-1 coa Comunidade Valenciana.

Foto Cortesía Futgal. Nova cortesía XF

—

MALENA MIERES ESTARÁ EN VALENCIA COA SELECCIÓN GALEGA

A selección xuvenil xogará a primeira fase en Llíria

A futbolista pontesa Malena Mieres García foi convocada pola Selección Galega Sub18 para a disputa da primeira fase do Campionato de España que se xogará esta fin de semana en Llíria (Valencia).

A selección galega ten dous rivais moi complicados nesta rolda xa que se enfrontará ao País Vasco o sábado 16, e ó locatario Comunidade Valenciana o domingo 17, ambos encontros ás 12:15, nos Campos de El Canó.

Malena competirá por un posto na portería con Aroa Naya, do Friol. As 18 convocadas, entre as que destaca a subcampiona de Europa Sub17 Tere Abelleira, son as seguintes:

RC Deportivo de A Coruña: Antía Delgado, Laura Vázquez, Malena Mieres, Rosalía Muíño, Teresa Abelleira

Victoria CF Santiago: Carolina Brañas, María Nogueira, Navia Rendo, Tatiana Barcia

CPM Friol Lugo: Aroa Naya, Marta López, Sabrina Morales

Atlántida Matamá Vigo: Lara Martínez, Sara Deben, Xiana Iglesias

Sárdoma CF Vigo: Ainoa Galarza, Inés Faro

Viajes Interrias Portonovo: Carla Rial

Nova cortesía de Xose Ferreiro

—

SEGUNDA TERRITORIAL GALEGA. CR FENDETESTAS 47 – SANTIAGO RC 0

O equipo pontés despide o 2017 como máximo aspirante ó título xunto ó Zalaeta.

O Fendetestas pontés de Rugby venceu este sábado por un contundente 47-0 a un rival directo como o Santiago co que ademais dos catro puntos polo triunfo, lograron o bonus ofensivo.

Dous ensaios de Antonio, Andrés e Joel, e un de Rober, que acertou seis dos sete lanzamentos a paus, resolveron un encontro que xa chegou 28-0 ó descanso.

Xogaron Antón, Pablo (Rafa 52´), Joel, Toño, Rober, Antonio, Javier, Miguel (Jesús Francisco 1´), Iván, Andrés, Óscar, Luis, Víctor Manuel (Roberto 76´), Asier (Ángel 52´), Pablo.

Nesta xornada tamén venceu en partido aprazado, 51-19, o Zalaeta ó Barbanza, polo que se comprime a loita pola Liga entre os de Arteixo e os ponteses antes do remate do 2017.

Zalaeta ten 35 puntos, por 34 do Fendetestas. Nun segundo grupo estarían Santiago con 28, Mareantes B 25 e Muralla 23. Nas últimas prazas, Vigo B ten 14, Barbanza 12, e pecha Ourense B con 7.

Fotos cortesía Facebook Fendetestas. Nova cortesía XF

—

SEGUNDA DIVISIÓN “B” DE FÚTBOL SALA: ZAMORA FS-O ESTEO FS (8-1)

O cadro pontés remata o ano décimo con 17 puntos.

O equipo pontés de fútbol sala do Esteo despediu este sábado o 2017 e a primeira volta con unha contundente derrota ante o Zamora por 8-1, equipo que aumenta a súa ventaxa no liderato ata os catro puntos sobre segundo e terceiro.

Pese a que Martín adiantou ós de Javi Saa, os locais xa marcharon ó descanso con 3-1, redondeando no segundo tempo ata o 8-1 definitivo anotado polo ex xogador do Autos Puentes, o porteiro Santos.

O cadro pontés foi vitima da calidade do equipo local e da carencia de rotacións que acusa xa dende fai moitas xornadas.

Son décimos con 17 puntos, e coma os equipos que ocupan as tres últimas prazas non puntuaron os ponteses manteñen a mesma distancia que tiñan na anterior xornada.

FICHA DO PARTIDO

ZAMORA FS: Santos, Aitor, Sergio Simón, Diego, Pablo – cinco inicial – Jiménez, Sergio Hernández, Alber, Héctor, Pablo, Mario.

O ESTEO FS: Javichu, Martín, Gerardo, Pana, Dani Martínez – cinco inicial – Héctor, Rober Paz, Diego.

ÁRBITROS: Hevia Campa, Santoveña Fernández, Román Beuko (Asturias-Zamora). Amarelas a Javichu, Gerardo, Héctor, Pana e Dani Martínez.

GOLES: Min. 3 (0-1), Martín. Min. 8 (1-1), Sergio Hernández. Min.12 (2-1), Sergio Hernández. Min. 18 (3-1), Sergio Simón, de penalti. Min. 28 (4-1), Sergio Hernández. Min. 31 (5-1), Pablo. Min. 35 (6-1), Aitor. Min. 37 (7-1), Mario, de penalti. Min. 38 (8-1), Santos.

INCIDENCIAS: Pavillón Municipal Ángel Nieto. Partido correspondente á decimoterceira xornada de Liga. Uns 200 espectadores.

Liga da Terra Chá – Sábado 16 –
Cadete. O Esteo-Pastoriza (6-0)
Infantil. O Esteo A-Pastoriza (4-1)
Infantil. O Esteo B-Begonte B (3-2)
Alevín. O Esteo-Begonte (7-1)
Benxamín. O Esteo-Begonte (5-10)
Prebenxamín. O Esteo-Begonte (2-0)

Nova cortesía Moisés Fernández e Xose Ferreiro

—

LIGA DE VETERANOS AS PONTES 2017-18

Interesante xornada na que caeu o anterior líder, o Mav Abogados, tras 10 triunfos consecutivos

Moi interesante xornada a desta fin de semana na Liga Local de Veteranos, pois o que era líder con 10 vitorias, o Mav Abogados, caeu 1-2 ante o Galiorient, e Tomás Díaz, con dous tantos, deulle emoción á Liga.

A día de hoxe están empatados Muebles Eume e Mav Abogados con 30 puntos pero o mellor goal average do equipo de Basoa, (+33) por (+26) dos rivais, situao momentáneamente no liderato, e non é para menos, pois este sábado, voltaron a gañar 9-1, como fixeran contra A Cepa, nesta ocasión, ó colista Electricidad J&O.

Nunha xornada tan goleadora, tamén se puxo interesante a loita polo pichichi e Juan Canosa (La Galaxia) firmou un “póker”, que lle fai liderar a táboa con 16 tantos, seguido de Kivo (Muebles Eume) con 14. Trece goles suman Fernández (A Cepa) e Tomás (Galiorient) e 11 Óscar Dorado (Muebles Eume).

Muebles Eume e Mav Abogados suman 30 puntos, por 22 de La Galaxia, 17 da Cepa, e 16 de Bar Jardín-Lecar 712 e Galiorient. Máis abaixo estaría Farmavida con 10 puntos, MMYPEN con 9, As Pontes 74 con 7 e pecha Electricidad J&O con 4.

A Liga non retorna ata a segunda semana do 2018, e comeza co prato forte que pode decidir o título, i é que o sábado día 13, ás 20:00, xogan os dous primeiros clasificados.

RESULTADOS 11ª XORNADA
MAV Abogados-Galiorient (1-2) (Narciso / Tomás 2)
Electricidad J &O-Muebles Eume (1-9) (Manolo / Oscar Dorado 4, Kivo 2, Miguel 2, Quinto)
Bar Jardín-Farmavida (5-2) (Cabanela 2, Miguel, Felipe, Héctor / Juanjo, Alberto)
La Galaxia-A Cepa (7-2) (Juan 4, Nené 2, Sito / Fernández 2)
MMYPEN-As Pontes 74 (4-2) (Luis, Pazos, Choupi, Oscar / Paz 2)

CALENDARIO 12ª XORNADA
13/01/2018 – 19:00 FARMAVIDA – ELECTRICIDAD J&O
13/01/2018 – 20:00 MAV ABOGADOS – MUEBLES EUME
14/01/2018 – 10:00 BAR JARDÍN – GALIORIENT
14/01/2018 – 11:00 A CEPA – AS PONTES 74
14/01/2018 – 12:00 LA GALAXIA – MMYPEM

Nova cortesía de Tino Prieto e Xose Ferreiro

—

PREFERENTE NORTE. RIBADEO FC 2 – CD AS PONTES 0

Triunfo do equipo lucense, que foi máis voluntarioso ó longo dos 90 minutos, e sentenciou no tempo de desconto

Derrota sen paliativos do cadro pontés na tarde de onte, co que remata o 2017 moi lonxe dos postos de ascenso, porque pese á terceira posición provisional, varios equipos con dous partidos pendentes probablemente acaben superando ó equipo azul cando todos sumen 18 partidos xogados.

Nun campo embarrado e impracticable para os dous conxuntos, comezaron moito máis metidos no partido os da Mariña, e tiveron varias ocasións nos primeiros quince minutos. Nun balón despexado cara o centro por Criado, Poratti disparou por riba do longueiro (4´). Pero máis clara sen dúbida foi nunha xogada na que sae Bossa co balón dende atrás, quere mandalo ao outro campo, rebota en Adrián, e o balón vaille ós pes de Criss, que por querer regatear a Paco, trastabillouse e perdeu de marcar un gol que estaba case feito (8´).

Tanto foi o cántaro á fonte, que nunha xogada de combinación na que o extremo dereito centra no borde da área completamente só, con Roberto fóra de sitio, rematou de primeiras Criss, salvou Paco como puido, caeulle nos pes a Rego que despexou moi frouxo, e acabou marcando Criss, case máis por gañas que por técnica (15´).

Cando o As Pontes comezou a tocar un pouco os locais xa ían 1-0 e gracias. Seguiron dominando os celestes, pero antes do descanso resaltar un tiro de Bossa que despexa Hugo, e no rexeite Eloy manda o balón ó fondo das mallas, entendendo o colexiado que aproveitándose da situación de fóra de xogo (22´). Máis tarde é Dani, tras un córner, quen remata fóra (32´).

Pese a que no comezo do segundo período nunha boa xogada de Pardo, acaba rematando Eloy frouxo e ás mans de Hugo (48´), puideron anotar o segundo os visitantes, nunha xogada na que Poratti fai un caño a Dani, dispara, e salva Paco coa man (51´).

O As Pontes buscaba o empate con poucas ideas ante un conxunto local moi ben prantado e no que os seus dous centrais Marcos Peña e Pablo Rivas gañaron case todas as accións a Eloy e Iglesias.

Resaltar un remate de volea do recén ingresado Alex Cabarcos que marcha preto do escuadro (67´), e un centro de Rafa Casanova tras unha perda de Adrián que se pasea pola área pequena sen atopar rematador (75´).

Moi brillantes os dous ex xogadores do Racing de Ferrol, dando unha habitual lección de cátedra, con 38 anos o arxentino, e con 35 o de Friol. Tivo o empate o conxunto pontés nunha internada de Quique por banda esquerda, ó que lle envían un balón dende a dereita, que controla e dispara por riba do escuadro, moi preto do longueiro (85´).

Pero nos derradeiros minutos, o impetuoso conxunto local fixo catro ou cinco contras moi perigosas, incluido un gol de cabeza anulado a Miguel Gomes por suposto fóra de xogo (87´) ata que no 93´ Luqui quedou completamente só, e marcou de tiro forte por baixo sen oposición defensiva.

O As Pontes pecha o 2017 con apenas 31 puntos en 18 partidos e deberá gañar ó Arzúa no comezo de ano para manter algunha mínima opción no que será o remate da primeira volta.

2 Ribadeo FC. Hugo, Pablo Rivas, Rafa Casanova, Marcos Peña, Santi (Martín Traba 88´), Poratti, Tichu (Miguel Gomes 81´), Juanma, Criss (Luki 66´), David Rodríguez (Jacob 58´), Iván Rodríguez.

0 CD As Pontes. Paco, Criado, Roberto (Alex 66´), Rego, Dani, Martínez, Ramos, Bossa, Eloy, Iglesias (Carba 82´), Pardo (Quique 68´).
Goles: 1-0 Criss (15´). 2-0, Luqui (93´).

Árbitro: Edgar Soto Eiroa (A Coruña). Auxiliado nas bandas por Belmonte Martell e Nava Rey. Amarelas a Criss, Juanma e Jacob.

Campo e incidencias: Pepe Barrera. Campo moi embarrado e con presencia de máis de 200 espectadores.

Nova cortesía de Xose Ferreiro

—

RESULTADOS CD AS PONTES SEMANA 15-16-17 DECEMBRO

Vitorias do Feminino, Xuvenil, Benxamín A e Prebenxamín A

FEMININO
EUME DEPORTIVO-CD AS PONTES (0-4)

O equipo feminino gañou 0-4 na súa visita a Pontedeume. Os goles de Carlota e dous de Paula Baamonde sentenciaron o encontro antes do descanso e mediado o segundo tempo un cuarto de Paula Castro deron tres importantes puntos ó cadro de Julio Montero.

Son cuartas con 28 puntos antes de recibir ó Cariño, terceiro con 31. Xogaron Leti, Yoli, Nuria, Indira, Noelia, Nerea, Xeila, Paula Castro, Carlota, Paula Baamonde, Lucía e Uxía.

XUVENIL
CD AS PONTES-CD NARÓN A (2-1)

Sufrida vitoria do Xuvenil pontés no seu encontro ante o Narón A. Na primeira parte os locais dominaron máis, pero tamén se puido ver un tiro ó poste dos visitantes e unha boa intervención de Meidán.

A segunda comezaba cun gran gol de Óscar Calvo tras saque de córner, de cabeza polo escuadro, ó que respondeu rápido o conxunto amarelo, que marcou Sergio tras un forte disparo dende fóra da área, que se acabou colando por alto a pesar de tocar Meidán.

Despois dunha acción na que os visitantes reclamaron penalti, nunha boa xogada local, Óscar cédella a Cristian, que marca o 2-1 de forte disparo por baixo chegando dende atrás. O propio Cristian puido sentenciar nunha xogada na que Andrés lanza un disparo case dende o medio do campo, o porteiro salva como pode, e con toda a porta para él, o dianteiro manda o balón moi alto.

Os de Felipe Mieres conservaron a vitoria e seguen na dura poxa polo título, que ten ó Eume líder con 15 puntos, seguido de As Pontes, Narón A e Portuarios con 12. Antes do remate do 2017 visita o As Pontes Pontedeume nun partido moi importante.

Xogaron Meidán, Carlos, Breijo, Pablo, Bruno, Vilela, Óscar, Dani, Cristian, Xose e Andrés, entrando despois Fraga, Derick e Jose.

CADETE
SCDR GALICIA DE CARANZA B-CD AS PONTES (2-1)

Derrota do Cadete na súa visita a Caranza. Nun partido no que se marcaron os goles nos derradeiros vinte minutos, Hugo Díaz e Hugo Lamas puxeron terra de por medio, e case sen tempo recurtou distancias Vicente.

Cuartos con nove puntos, reciben ó Val, sexto con sete. Xogaron Juan, Eyob, Xavi, Alejandro, Antonio, Nono, Adrián, Santi, Vicente, Xan e Joan, entrando despois Xoel, Andrei, Mohamed e Iván.

INFANTIL
SCDR GALICIA DE CARANZA B-CD AS PONTES (3-3)

Empate 3-3 do Infantil na súa visita a Caranza. Nunha Liga moi apretada, lideran Ferrol B e O Val con 15 puntos, seguido de Narón A, As Pontes e Caranza B con 13, recibindo a vindeira xornada no Poboado ó equipo naronés.

Dous goles de Xoel Purriños e un de Jandro López. Xogaron Hugo Bouza, Eloy, Xose, Anxo, Samuel, Mario Fraga, Xoel, Hugo Blanco, Diego, Jandro, Luis, Iago, Mario Regueiro, Ángel, Íker, Sergio.

ALEVÍN
SD O VAL B-CD AS PONTES A (4-4)
CD AS PONTES B-EFB AMISTADE DE MEIRÁS (0-2)

O Alevín A empatou 4-4 na súa visita a Sinde, goles de Israel Varela (2), Anxo Blanco e Xandre Fernández. Sextos con catro puntos reciben ó Eume B, cuarto con seis. Pola súa banda o Alevín B perdeu 0-2 co Amistade de Meirás, e cun punto visitan ó Narón B, que ten tres.

BENXAMÍN
CD AS PONTES A-SD O VAL (2-1)
EFR RACING DE FERROL C-CD AS PONTES B (3-2)

O Benxamín A gañou nos últimos minutos 2-1 ó Val, goles de Íker Ares e Xalo González, e sextos con tres puntos, visitan ó Ánimas, que ten seis. O Benxamín B perdeu 3-2 co Ferrol C, goles de Xavi García e Xandre Domínguez, e quinto con tres puntos recibe ó Caranza D, que aínda non puntuou.

PREBENXAMÍN
CD AS PONTES A-CEDEIRA SD (4-0)
SCDR GALICIA DE CARANZA-CD AS PONTES B (4-3)

O Prebenxamín A gañou 4-0 ó Cedeira, dous goles de Xoel Galego, e un de Brais Varela e Íker Díaz, e cuarto con 3 puntos visita ó Racing de Ferrol, coa mesma puntuación. O Prebenxamín B pola súa banda perdeu 4-3 na súa visita a Caranza, goles de Xoel Timiraos (2) e Brais Gómez, antes de recibir ó Ferrol B, ambos sen puntuar.